|
|
|
 |
A Coruña
Unha cidade para visitar
|
O municipio da Coruña
está situado no extremo noroeste de España e forma parte
da Comunidade Autónoma de Galicia. É unha cidade atlántica
cun clima suave.
O municipio ocupa unha superficie de 36,8 km2
e acada os 243.785 habitantes, cunha densidade de 6.624
habitantes por km2. A necesidade de lugares
de recreo urbano e a escaseza de solo fan que este sexa
máis rendible como soar edificable, determinando que as
superficies dedicadas ás actividades agrícola e industrial
se centren actualmente en municipios limítrofes da Coruña.
Con todo, o seu carácter de municipio costeiro outórgalle
á pesca unha grande importancia na cidade (máis que polos
seus postos de traballos directos, polos indirectos que
esta actividade xera noutros sectores). Todo isto fai
que o sector servizos sexa o predominante na cidade, constituíndose
esta no centro económico e cultural da área ou comarca
circundante e que funcionalmente xoga o papel dunha metrópole
rexional, cunha influencia que se manifesta non só na
comarca, senón tamén en toda a comunidade.
Nas últimas décadas producíronse diversos cambios na súa
estrutura: comparte diversas funcións administrativas
e reduciu outras militares, reforzou a súa estrutura empresarial
e de negocios e destacou en diversos subsectores coma
as finanzas, a comunicación, a distribución e rede comercial,
a industria manufactureira, a sede rexional do terciario
profesional e dos servizos avanzados e hai que engadirlle
a isto a importancia da actividade portuaria (principal
porto de Europa en canto á pesca fresca desembarcada)
e o auxe na actividade do porto comercial (petróleo e
sólidos a granel que son o 75% do tráfico portuario galego).
Nos últimos anos relanzouse a cidade coa mellora de accesos,
o aumento da súa infraestrutura cultural, deportiva, de
lecer e científica, a mellora e rehabilitación do conxunto
urbanístico, a recuperación do bordo marítimo e a potenciación
do sector turístico. Todo isto reafirma o carácter de
cidade administrativa, comercial, portuaria, cultural
e turística que xa tradicionalmente tiña.
|
|
|
|
|
|
