O concelleiro de Emprego e Economía Social, Alberto Lema, reuniuse na tarde deste xoves con representantes dos praceiros e praceiras dos mercados municipais coruñeses para estudar as achegas formuladas polos traballadores e traballadoras ao borrador de ordenanza de mercados que elabora o Goberno municipal, e que lle foi presentado ao colectivo o pasado mes de decembro. O texto, segundo confirmou o responsable municipal ao remate do encontro, incorporará “boa parte” das propostas realizadas durante este proceso, que xa se incluíron nese borrador “na súa grande parte”. Nese sentido, Lema agradeceu aos e ás vendedoras o traballo realizado e amosou a súa satisfacción polos acordos acadados grazas ao diálogo, que, como salientou, facilitarán unha ordenanza “de consenso” na que, por primeira vez, se consulta ao colectivo, segundo lle transmitiron ao concelleiro os e as representantes do sector.

No encontro desta tarde, o concelleiro analizou coas praceiras e praceiros cada unha das propostas plantexadas durante este proceso, que foron asumidas na súa maioría. Entre elas, a nova ordenanza permitirá, de acordo coas peticións dos e das traballadoras, que unha persoa concesionaria poida ter ata dous postos, e non un, como ocorría ata agora. Do mesmo xeito, o texto ampliará a duración das concesións, de vinte a trinta anos, tal e como viña pedindo o colectivo.