Xusto cen anos despois, e co mesmo espírito, o 5 de agosto do 2013 terá lugar nesa mesma praza A Verbena dos 100 anos: Cantando a Galicia. Rosa Cedrón, Sito Sedes e Paco Lodeiro, acompañados por unha orquestra de cinco músicos, únense para a recuperación da verbena clásica galega e interpretarán temas de onte e de sempre nunha xornada moi especial.
Son tres referentes musicais da nosa terra que se reuniron para dar forma ao primeiro proxecto de Cantando a Galicia, que inclúe un disco homónimo que saíu á venda o pasado 15 de xuño.

Xuntos seleccionaron un repertorio apto para todos os públicos, abarcando debde os clásicos máis recoñecidos como "Lela" ou "Aí vén o Maio", ata temas dos Tamara e Los Satélites e de autores como Andrés do Barro, Ana Kiro ou Xil Ríos.

Haberá boleros, pasodobres e cha-cha-chá. Sen dúbida, a recuperación do baile como elemento condutor das verbenas será un dos retos deste primeiro Cantando a Galicia, que contará con Paco Lodeiro como mestre de cerimonias.