Polo tanto, o proxecto True Colours aliméntase de moitos dos principios conceptuais e recursos plásticos empregados nas pezas da serie Origami. 

As primeiras instalacións da serie True Colours formuláronse como intervencións murais de carácter pictórico, que utilizaban masivamente a figura de orizuru (grullas de papel). O feito de recorrer a grullas orizuru xorde do desexo de ordenación radical, de pregado meticuloso e ríxida planificación de cada unha destas instalacións. Ao contrario do que sucede nas pezas da serie Origami, as grullas de papiroflexia foxen do valor histórico e narrativo non lineal destas para reivindicarse -na súa faceta orixinal: luz, cor e figura- como o fetiche fundamental do imaxinario artístico actual do creador santiagués.

O xogo visual coa cor, inicialmente sen máis pretensión que a de levar a cabo estudos cromáticos e a súa interacción co soporte mural, deveu nunha exploración tridimensional co volume da peza e a luz como elementos igualmente importantes, así como as construcións de sombras que tamén se xeran.

José Andrés Santiago

É doutor en Belas Artes, licenciado pola Especialidade de Pintura (Facultade de Belas Artes, Universidade de Vigo). Dende o ano 2005 é membro do Grupo de Investigación dx5 – dixital & graphic art research da Universidade de Vigo, especializado en gráfica contemporánea.

A súa nova traxectoria como creador foi recoñecida con premios e seleccións en concursos dende 2008: no 2013, seleccionado na XI Bienal Pintor Laxeiro (Lalín, Pontevedra); en 2011, Adquisición de Obra no Premio Isaac Díaz Pardo (Deputación Provincial da Coruña); Mención de Honra no Certame Xuventude Crea 2010 (Xunta de Galicia); Mención de Honra nos Certames de Arte Gráfica para Jóvenes Creadores (Calcografía Nacional, nos anos 2009 e 2010); Accésit no IX Certame de Artes Plásticas (Deputación de Ourense, 2010); Mención de Honra en GZ Crea (Xunta de Galicia, 2009); Mención de Honra no Premio de Fotografía Galicia Innovadora (Fundación Galicia-Europa, 2009); e Premio de Adquisición de Obra (Fundación Laxeiro, 2008).

Entre as súas principais exposicións individuais e colectivas, ademais da realizada en 9THE13 en 2010, destacan: Promenades solitaires au pays du soleil levant (Galería Red Zone, Xenebra, Suíza, 2012); Afinidades Selectivas (exposición colectiva, Casa da Cultura Galega, Vigo, 2012); Watts (exposición colectiva, Sala X da Facultade de Belas Artes de Pontevedra, 2010); XXI Premio de Gravado Máximo Ramos (Centro Cultural Torrente Ballester de Ferrol, 2010); Certame de Arte Gráfica para Jóvenes Creadores (Sala de Exposicións de Calcografía Nacional, Madrid, entre 2007 e 2010); Novos Valores (edicións de 2007, 2009 e 2010, Deputación de Pontevedra); Certame de Artes Plásticas Isaac Díaz Pardo 2009 (Deputación da Coruña); II Encontro De brujas y mariposas (C.C.C. ICAIC, A Habana, 2009); V, VI e IX Certames de Artes Plásticas (Deputación de Ourense, entre 2006 e 2010); II Premio de Artes Gráficas Jesús Núñez (CIEC, Betanzos, 207); e XIV Salón Internacional do Gravado Estampa (Madrid, 2006).