Marta Pardo de Vera nace na Coruña. Aos dez anos, e da man dos pintores Leonardo Abelenda e María Luisa Pedrero, comeza a súa formación en debuxo e pintura, que completa despois na Escola de Belas Artes e oficios Pablo Picasso da súa cidade natal, contando entre os seus profesores con pintores como José Luis Rodríguez e Mariano García Patiño ou o escultor Antonio López.

En 1967, e tras o seu paso polas Escolas de Artes e Oficios de Madrid, Valencia e Sevilla, emprende a súa carreira profesional cunha exposición no Museo Provincial de Lugo. A partir dese momento, empeza un longo período de formación autodidacta, que a leva a realizar diversas viaxes de estudo por Europa Occidental e Oriental, así como por Alxeria, Tunes e Marrocos. Na súa carreira profesional, ademais de en Lugo, Marta Pardo de Vera expuxo individualmente en varias ocasións en lugares como A Coruña, Vigo, Santiago de Compostela, Ferrol, Tarragona ou Madrid. Tamén participou en numerosas exposicións colectivas que levaron a súa obra por diversas cidades españolas e do estranxeiro (estivo no Salón des Nations de París e participou no II Congreso Nacional de Artistas Plásticos do Porto, entre outros). Ademais, a súa obra foi recoñecida no 2001 gañando o Primeiro Premio no Certame de Pintura Adeslas. Recentemente foi nomeada socio de honra da Asociación Pablo Picasso da Coruña.

Esta exposición conta coa colaboración da coordinadora de exposicións Cristina Carballedo.