Begoña Ante, Paula Cabaleiro, Carolina Cruz Guimarey, Christian García Belo, Lula Goce, Jorge Perianes, Laura Piñeiro e Neves Seara son o oito artistas que protagonizan a exposición work-in-progress TÉ CON MADALENAS. Un proxecto artístico que pretende mostrar o ser e o crear do oito persoas que o conforman e que desenvolverán, ao longo de tres meses e especificamente para NORMAL, oito proxectos polifacéticos (instalacións, talleres, workshops, performance, proxectos de colaboración cidadá) nos que nos falarán, desde unha nudez biográfica sen precedentes, deles mesmos e dos tempos, espazos e memorias que os constrúen.

Pero TÉ CON MADALENAS non fala de retratismo convencional. A esencia do que define a esta selección de artistas non se atopa en grandes óleos, nin en impoñentes medios. Para eles, o esencial escóndese invisible tras os obxectos aparentemente máis insignificantes (un botón, un pedazo de papel) ou intangibles (un recordo, unha mirada, a aura dunha persoa doutra época). O espectador descubrirá as súas esencias a través de moi diversos elementos do cotián: do que nos transmite unha escaleira de man, do que se oculta tras unha cadeira baleira, ou dunha peza desgastada.

Con todo, o máis importante deste recoñecemento íntimo é que será un camiño de ida e volta. Do mesmo xeito que ocorría no narrado por Marcel Proust, o noso TÉ CON MADALENAS quere ser responsable do espertar evocador dos sentidos e, por iso, e para facer visible aquilo que tampouco o é habitualmente no ámbito artístico, este proxecto work-in-progress é tamén unha invitación aberta a todos os visitantes e veciños de NORMAL, que esperamos participen e cren connosco a través das moi diversas actividades gratuítas que os artistas desenvolverán nos próximos meses.

Comisariado e coordinación: CLARA RODRÍGUEZ CORDEIRO