Para poder participar é preciso enviar a corunafilm@coruna.es a ficha de inscrición da actividade antes do 30 de setembro.

Miguel Ángel A.S. Cogolludo. La guerra de las galaxias marcou a súa infancia e máis adiante, grazas ao seu interese polos ordenadores, aprendeu a realizar gráficos en 3D e videoxogos. Tras realizar estudos de produción de vídeo, en 1996 rodou a súa primeira curta, que se estreou dous anos máis tarde co título de ODE: El día del juicio, e co que obtivo o premio “Almenara de Ouro” no Festival de Punta Umbría. Nese ano entrou a formar parte do equipo de Kandor Graphics, por entón a rama de animación da empresa Melkor Software. Alí comezou realizando traballos como a visualización de experimentos en gravidade cero que realizou Pedro Duque na súa viaxe á Estación Espacial Internacional e vídeos de difusión científica, como Viaje al interior del cráneo, etc. No 2005 realizou xunto ao seu equipo a produción de El lince perdido, dirixida por Manuel Sicilia e Raúl García, estreada no 2008 e gañadora dun Goya á mellor película de animación, ademais de estar nomeada aos Óscar. Seguidamente, traballaría na curtametraxe La dama y la muerte de Javier Recio, que levou o Goya á mellor curta de animación do 2009 e foi nomeada aos Óscar, ademais de conseguir máis de 30 premios. Actualmente prepara a postprodución da súa segunda curtametraxe, SW:THX, unha homenaxe a La guerra de las galaxias.