Na procura da máxima calidade literaria, tanto como da maior diversidade a nivel de xénero, xeración, estilo e forma de concibir a poesía, o ciclo Poetas Di(n)versos ofrece unha mostra ampla e representativa da poesía contemporánea mundial á vez que se promove a escritura en galego. O ciclo constitúe a única programación estable de poesía de toda España que inclúe autores locais e internacionais.

O ciclo ten a súa seguinte cita o luns 22 de abril co italiano Claudio Pozzani e o poeta vigués Manuel Forcadela. Ambos os autores demostran que a vontade experimental e o emprego doutros recursos expresivos para enriquecer a poesía non son só patrimonio das últimas fornadas de creadores. Os dous introducirán elementos sonoros ou videográficos na súa actuación.

O ciclo continuará o 6 de maio cos autores Olalla Cociña (Viveiro, Lugo) e o macedonio Nikola Madzirov, un dos nomes imprescindibles da poesía europea dos próximos anos e que presenta o seu primeiro libro traducido ao castelán, publicado por Pre-Textos. A última sesión da temporada será o 3 de xuño, con creadores que tenden a man a outras linguaxes creativas. Branca Novoneyra apoia os seus versos na danza contemporánea e o brasileiro Márcio André, no son e na performance.

Todos os actos do último trimestre desta edición, que se desenvolverán o 22 de abril, o 6 de maio e o 3 de xuño ás 20.30 horas no Ágora, son gratuítos para todo o público interesado que, ademais, poderá solicitar a sinatura dos escritores invitados.