Dende tempos prehistóricos o ser humano sentiu a necesidade de expresar os seus sentimentos a través da música e o movemento. Unidos dende un principio polos ritmos corporais máis básicos, como o da respiración ou o dos latexos do corazón, a música e a danza serviron para ritualizar os acontecementos sociais máis importantes ao longo dos tempos. Esta relación entre música e danza foi evolucionando ao longo da historia, deixándonos todo un legado de formas musicais danzables, moitas delas antigas como a Allemande, a Courante, a Zarabanda, a Giga ou a Polonesa, e outras máis modernas, como a Mazurca ou o Vals. Estas formas musicais, unha vez integradas no repertorio musical, sufriron unha evolución importante dende a súa composición orixinal para ser danzadas ata o seu posterior uso como obra de concerto. Neste concerto para piano centrarémonos na importancia das formas danzables na música e como os compositores das diferentes épocas históricas achegáronse máis ou menos ás súas orixes bailadas.