Guillermo Jack (A Coruña, 1972) presenta unha nova mostra de pintura na Galería da Casa-Museo Casares Quiroga.

Trátase dunhas quince pezas en acrílico sobre lenzo e amplo formato (a maior parte) nas cales este pintor formado inicialmente como deseñador gráfico, preséntanos un percorrido de contundente e enerxética plástica de clara influencia pop, movemento que ao mesmo tempo desmitifica, desmarcándose de fórmulas manidas e moldes preestablecidos, xa que a súa liberdade creativa e impacto visual é utilizado por encima de calquera normativa para dar a cada peza a súa pulsión requirida.

Os cadros son na súa maioría figuracións de cálido cromatismo e fortes contrastes onde se mesturan as cores planas cos volumes. Na temática e a técnica combina o premeditado co espontáneo, o impacto visual directo co transfondo psicolóxico, e todo vai dando forma a un particular universo onde tan dispares correntes e influencias como o citado pop ou o realismo levado ao seu máximo expoñente conflúen nun conxunto que dá como resultado unha divertida explosión pictórica en technicolor.