A Fundación Rodríguez Iglesias pretende con esta exposición achegar ao público coruñés a obra dun dos escultores galegos con máis proxección, que conta con máis de trinta anos de traxectoria profesional chea de premios e exposicións de ámbito nacional e internacional. Un artista intelixente e cun dominio técnico exquisito que non deixa de sorprender e innovar. A exposición recolle unha selección de vinte das súas últimas obras, na que os visitantes encontrarán unha síntese do seu traballo e dos elementos que a caracterizan.

Así poderanse ver pezas de diversos materiais (aceiro cortén, madeira, granito, cobre ou formigón), mesturas entre estes materiais, as ataduras e grampas, ou os ocos, buracos e ventás. Pero, especialmente, terán ocasión de ver pezas de carácter vertical, nas que o artista logra que nos deteñamos e busquemos no seu interior. Son pezas que podemos contemplar dende fóra, pero nas que tamén nos podemos internar, interactuando cos seus elementos.