Formada en danza contemporánea e ximnasia deportiva, é Roser López destacada intérprete e coreógrafa emerxente da escena actual. Graduada no departamento de danza contemporánea da Theaterschool de Ámsterdam, completou posteriormente os seus estudos na prestixiosa SNDO da capital holandesa, e cunha bolsa danceWEB-Europe, para o festival ImpulsTanz de Viena, e outra para o Tanz im August de Berlín.

Como bailarina formou parte das agrupacións Magpie Music Dance Company, dirixida por Katie Duck; traballou coa coreógrafa Marta Reig Torres, con Susana Amarante Duarte, o colectivo As Malqueridas, o creador Iago Pericot, a compañía de Bebeto Cidra, Pere Faura e co coreógrafo e vídeo-maker Iker Gómez.  Pero é sen dúbida a compañía Mudances, dirixida por Ángels Margarit, agrupación crave da súa traxectoria.

Como coreógrafa, iniciou Roser López a súa andaina en 2006 co só The´lizard s skin, primeiro Premio no certame de sós Masdanza. Outras obras do seu repertorio son Còncau (2007), estreado no Festival Internacional Dies de Dansa; Còncau II, visto no programa de mozos creadores BCSTX do Mercat de lles Flors, e o dúo Miniatura (2010), gañador do terceiro Premio do Certame Coreográfico de Madrid 2010.