O CICA (Centro Interdisciplinar de Química e Bioloxía, pertencente á UDC) organiza un Congreso Científico no que unha quincena de estudantes de 4º da ESO, FP e Bacharelato presentarán os resultados das estadías que realizaron nos laboratorios do CICA en formato de póster.

Os alumnos e alumnas defenderán o seu póster nunha sesión aberta ao público xeral. Tras a deliberación do xurado, catro alumnos realizarán unhas exposicións orais máis extensas.

O tribunal que avaliará os traballos está formado por:

- Patricia Barciela, directora técnica da Domus.

- Cristina Naya, vicerreitora de divulgación, cultura e deportes da UDC.

- Carlos María Rodríguez, graduado en Bioloxía pola UDC e profesor de secundaria.

- Andrea Carolina Cozzolino, estudante do dobre grao en Bioloxía e Química e alumna participante do programa Incrúst@te na pasada edición.

O proxecto Incrúst@te busca involucrar o alumnado no proceso de investigación científica e ofrecerlles a oportunidade de que o experimenten de primeira man realizando unhas prácticas experimentais nos laboratorios do centro, co obxectivo de aumentar as vocacións científicas, dar a coñecer as titulacións da Facultade de Ciencias da UDC, visibilizar o traballo do persoal investigadores e o papel da muller na Ciencia. Para iso ofrece a posibilidade a mozos e mozas de entre 14 e 17 anos de que aprendan a investigar no CICA nalgunha das catro grandes áreas (Biotecnoloxía, Medio Ambiente, Novos Materiais e Biomedicina) ás que pertencen os grupos de investigación participantes.