A mostra, unha produción propia da Fundación e comisariada por Pedro de Llano, catedrático de Representación e Teoría Arquitectónica da Escola Técnica Superior de Arquitectura da Universidade da Coruña, propón como facer unha nova arquitectura que mellore e se axuste á sociedade que vén, e cuestiona a relación entre o edificio, os seus destinatarios e as necesidades do medio, da paisaxe.

"Compañeiros de oficio" propón unha reflexión sobre o papel da arquitectura vernácula como piar fundamental da obra dun imprescindible grupo de arquitectos contemporáneos como Alvar Aalto, Álvaro Siza, Tadao Ando, Balkrishna Doshi, Peter Zumthor, Glen Murcutt, … ou como Charles-Édouard Jeanneret, Le Corbusier. Así mesmo, arredor da exposición organizarase un programa de actividades didácticas gratuítas e editarase unha publicación na que se recollerán os contidos presentes na exposición, documentación e textos adicionais que complementan e enriquecen os ditos contidos.

Achegamos máis información e imaxes da exposición cos seus correspondentes copyrights de obrigada publicación.