Amesmalúa é unha banda de músicos de distintas orixes que propón unha viaxe de encontros, unha maridaxe de memoria e paixón entre o flamenco e a canción popular galega, nunha proposta ligada ás músicas improvisadas con raíces no folclore. Ademais de coplas populares, cantigas e adaptacións, Amesmalúa tamén creou temas propios co sinal dun carácter unificador. Os títulos dos temas fálannos dun bilingüismo que procede do imaxineiro popular, e teñen o sentido veraz dun cante jondo tamizado pola languidez do sentir galego.
Amesmalúa presenta no Teatro Colón o seu primeiro disco tamén bautizado Amesmalúa, cantados en galego por Manuela Elena e musicados con toques flamencos, jazzísticos e a intres andalusís por Gautama del Campo e Juan Maya.