(EN CASO DE CHOIVA, TRASLADARASE AO CENTRO ÁGORA.)

17.30 H: XOGOS DO PAPORRUBIO

"Os xogos do Paporrubio" é un compendio de xogos autónomos e animados de temática agraria, que nos dá a coñecer un dos paxaros máis pequenos, rebuldeiros e cantaruxeiros da nosa fauna.

O noso paporrubio, calzado cuns zoquiños, guía a nenas/os e maiores por unha eira chea de xogos. As e os participantes nesta aventura terán que ir descubrindo como se xoga a algúns dos xogos, mentres que se sorprenderán noutros deles grazas ás pequenas historias contadas e cantadas polos animais e habitantes da granxa, elaborados con xoguetes, marionetas e xigantes.

A pretensión é facerlles accesible aos pequenos, a través da diversión en familia, unha cultura agraria que de por si adoita fascinar e marabillar.

19.00 H: MAMÁ CABRA: 15 primaveras

Mamá Cabra é un grupo de música infantil pioneiro na produción de espectáculos musicais pensados para o público infantil. A súa historia remóntase ao ano 2000 e partiu primeiramente para facer cancións para as clases de Educación musical de Gloria, unha das fundadoras do grupo.

O espectáculo – 15 primaveras

Despois de ler o poema do "Timoteo" do libro Rimas con letras, Gloria, emocionada e ilusionada toma unha decisión: encher o mundo de notas musicais de cores vivas con cheiro a campo verde, de sons máxicos que lles darán vida a historias máxicas, como a da cabritiña que se converterá en nai, da nosa Mamá Cabra.

Mamá Cabra presenta o seu novo espectáculo, en que fará un percorrido pola historia do grupo e das súas mellores cancións. Un espectáculo diferente cun formato de "concerto-teatro" onde se amosará unha nova Mamá Cabra disposta a seguir enchendo de ilusión e ritmo os corpos da xente miúda.