Arpa e piano

A historia moderna da arpa está marcada por dous apelidos ilustres no mundo dos fabricantes de instrumentos: Erard e Pleyel. E por un país, Francia, que a principios de século XX vía como os dous famosos fabricantes trataban de impoñer as súas diferentes evolucións na arpa clásica, realizando
encargos aos máis importantes compositores da época impresionista.

Finalmente sería a arpa Erard a que se impoñería entre os arpistas a nivel internacional, pero independentemente de cal das dúas patentes conseguise o beneplácito dos intérpretes, esta competencia entre os dous fabricantes deixounos un legado de magníficas obras escritas para a arpa moderna. Unhas obras que aínda hoxe seguen sendo unha referencia para os compositores actuais á hora de compoñer nova literatura para a arpa.

Neste concerto escoitaremos entre outros, a John Williams, quen ademais da súa brillante carreira na composición de música para o cinema, destaca tamén na composición de música de concerto, para a que compuxo numerosas obras orquestrais. Unha das últimas, composta no ano 2009 é o seu concerto para arpa e orquestra titulado On Willows and Birches.