O director escribirá o guión da curtametraxe e darao a coñecer ao resto do equipo con anterioridade á realización da actividade.

Os participantes deberán ser profesionais e/ou estudantes das seguintes disciplinas:

-        Dirección.

-        Produción.

-        Dirección de fotografía.

-        Son.

-        Montaxe.

Para poder participar é preciso enviar a corunafilm@coruna.es a ficha de inscrición da actividade onde se requirirá a seguinte información:

-        Biofilmografía.

-        Links aos seus traballos máis significativos.

-        Razóns polas que consideran que o festival debe elixir o seu perfil para participar na rodaxe da curtametraxe.

O director seleccionará entre os participantes a un xefe de equipo por cada unha das disciplinas; no caso da especialidade de dirección, o participante seleccionado desempeñará o cargo de Axudante de Dirección na rodaxe da curta.

Ademais, o director poderá ampliar o equipo de rodaxe elixindo o número de axudantes e auxiliares que sexan necesarios segundo do guión proposto.

Os participantes elixidos viaxarán á Coruña antes da realización do encontro e gozarán da enriquecedora experiencia de traballar co realizador rodando unha curtametraxe na cidade.

En 36 horas, o equipo deberá traballar na preprodución do proxecto, na rodaxe da curtametraxe e na edición do resultado final.

A organización non cubre os gastos de aloxamento nin o traslado á Coruña no caso de que os participantes residan fóra da cidade, pero si enviará información útil e calquera documento ou certificado que os participantes puidesen necesitar.

Isaki Lacuesta (Xirona, 1975). Licenciado en Comunicación Audiovisual, e Máster en Documental de Creación, hai quen di que é un dos nosos cineastas “máis libres e heterodoxos” e que no seu cinema, transgresor e experimental, “as fronteiras entre a ficción e o documental difumínanse para narrar o contraplano das historias”. Con máis dunha trintena de curtametraxes ás súas costas e 17 premios nos festivais máis importantes -entre eles a Cuncha de Ouro en San Sebastián por Los pasos dobles (2011) ou os galardóns en Sitges pola súa primeira longametraxe, Cravan vs. Cravan (2000)-, compaxina a dirección cinematográfica coa docencia nas universidades Pompeu Fabra, a Autónoma de Barcelona, Universidade de Xirona e o Centro de Estudos Cinematográficos de Cataluña, ademais de escribir artigos sobre cinema, música e literatura. Entre as súas películas figuran La leyenda del tiempo, Los condenados, La noche que no acaba e El cuaderno de barro. Actualmente roda en cooperativa Murieron por encima de sus posibilidades, unha comedia negra coral “con vocación berlanguiana” sobre cinco psicópatas que, indignados pola situación, secuestran o presidente do Banco Central de España.