Spill componse de 50 imaxes de gran formato que resumen os dous meses que este fotógrafo de recoñecido prestixio empregou en documentar o desastre que supuxo a explosión da plataforma petrolífera Deepwater Horizon no Golfo de México. Como o propio Beltrá afirma: “Desexo que as miñas instantáneas insuflen un maior respecto á conservación do planeta. Ocultas entre estas imaxes encóntrase a realidade do estado do noso medio ambiente e o legado que estamos a deixar para as xeracións vindeiras”.

O artista

Daniel Beltrá (Madrid, 1964) é un fotógrafo conservacionista instalado en Seattle (Estados Unidos), cidade dende a que se despraza ata diferentes puntos do planeta para documentar a natureza e o medio ambiente. Durante as dúas últimas décadas, o traballo de Beltrá levouno a percorrer os cinco continentes, participando en numerosas expedicións xunto a Greenpeace no Amazonas, o Ártico, os océanos do sur e os glaciares na Patagonia.

O seu traballo Spill fíxoo merecedor no 2014 de numerosos premios como o DAYS JAPAN International Photojournalism Award, o Picture of the Year International, o China International Press Photo, o International Photography Award, o Veolia Environment Wildlife Photographer of the Year (un dos premios internacionais máis prestixiosos de fotografía de medio ambiente) e o International Photographer of the Year Award, na categoría Deeper Perspective, nos Lucie Awards realizados en Nova York. Máis en http://www.danielbeltra.com/.