Veuno demostrando dende finais dos setenta cando irrompeu con Veneno e continúao certificando no presente, disco tras disco, concerto tras concerto. A última parada nese traxecto foi "Sensación térmica", o álbum gravado co produtor Raúl Fernández (Refree) no que o autor mostra o seu lado máis experimental. Trátase do seu particular modo de dicir que é un artista vixente e que mira ao futuro xusto despois de botarlle unha ollada ao pasado tras soprar as velas do 20 aniversario de "Échate un cantecito". Trátase da súa obra máis coñecida e a que lle permitiu deixar o seu traballo de funcionario para dedicarse en corpo e alma a escribir cancións e enriquecer a vida dos seus fans con elas. Alí atopábanse xoias como "Joselito" ou "En un mercedes blanco", cancións que xa se escoitaron en Riazor en 1995 e no 2008 nas dúas anteriores intervencións do andaluz no festival. En ambos os casos comprobouse a efectividade do seu directo e a valía dun repertorio directo, contaxioso e para todos os públicos. Agora chega con espírito renovado pero co repertorio maxistral de sempre.