"Sinto a chamada, algo me leva a plantarme de novo sobre un escenario, un impulso febril. Mesmo estou disposto a aceptar que se me convoque para facer unha proba, como se non me coñecesen, como se eu fose un principiante!".

Considerado como un dos grandes dramaturgos do teatro europeo das últimas décadas, o alemán Tankred Dorst asinou en 1991 un texto conmovedor sobre todas aquelas persoas que non conseguen ser protagonistas. Cinismo, humor, forza e delicadeza danse a man en "Yo, Feuerbach", unha certeira peza coa que Dorst converte en alegoría da existencia humana a historia dun actor envellecido que, a pesar do seu talento, vese obrigado a loitar por unha segunda oportunidade.

Baixo a batuta do director Antonio Simón, "Yo, Feuerbach" preséntase como un belo e intenso espectáculo sobre as crises sociais e persoais que nos obrigan a reinventarnos. Pedro Casablanc asume un dos maiores retos da súa carreira na pel dun actor en decadencia; un artista maduro con grandes calidades, pero con algún episodio escuro no seu pasado que o levou a atoparse sen traballo. Un abismo xeracional levántase entre el e o seu mozo antagonista sobre as táboas, un mozo e inexperto axudante de dirección que acaba de chegar ao mundo do espectáculo, encarnado polo actor Samuel Viyuela González.

Coprodución de: Grec Festival de Barcelona 2016, Velvet Events e Buxman Producciones co apoio do Departament de Cultura da Generalitat de Catalunya.

Venda de entradas:

Despacho Central: praza de Ourense: de luns a venres de 9.30 a 13 e de 16.30 a 19.30 h

Despacho do Teatro Rosalía: só días de función de 16 a 20 h

Venda telefónica: 902 044 226