Este sábado, día 31, A Coruña pechará a tempada deportiva coa celebración da sétima edición da carreira popular San Silvestre, unha proba de carácter festivo que percorrerá o litoral coruñés, ademais dos barrios de Peixería e Cidade Vella. A cita, que comezará ás 17.00 horas no Obelisco, contará coa participación de 3.500 deportistas, nunha edición na que, por vez primeira, poden participar rapazas e rapaces maiores de 14 anos. O trazado, dunha soa volta, levará ás e aos atletas populares a percorrer, durante 7.000 metros aproximadamente, os Cantóns, Juana de Vega, e o Paseo Marítimo até a entrada á Cidade Vella, á que accederán polas rúas Julio Portela Ceballos e Metrosidero. Desde aí pasarán por Maestranza, Porta de Aires, Amargura e Santiago, ata alcanzar a meta na Praza de María Pita tras cruzar Porta Real. Por este motivo, o Concello da Coruña, despregará un dispositivo especial de tráfico para facilitar o tránsito da veciñanza durante a tarde do sábado.

Os cortes ao tráfico comezarán contra as 15.30 nos Cantóns, no sentido saída da cidade, ata as 19.30 horas. O tráfico procedente da avenida da Mariña desviarase por Ambrosio Feijoo cara a avenida do Porto. A proba en ningún momento afectará ao tráfico no sentido entrada á cidade, e só estará suspendido o xiro cara rúa Nova desde as 16.30 horas ata as 17.10 horas, ao paso da carreira polo punto.

Desde as 16.45 pecharase ao tráfico o percorrido do circuíto ata o paso da carreira --cómpre destacar que a maior parte da proba transcorrerá polo Paseo Marítimo nos carrís situados xunto ao mar, e que os máis próximos ás casas se manterán abertos á circulación de vehículos--, e se abrirá polos cruzamentos unha vez pase a cola da mesma. Manterase a permeabilidade nos cruzamentos, como San Andrés - Praza de Pontevedra, glorieta de Adormideras, Paseo Marítimo - Veramar, Metrosidero - Maestranza, e Damas - Praza de Azcárraga.

Por último, o dispositivo tamén afectará a todas aquelas persoas residentes na Cidade Vella con vehículo,  que deberán saír pola Colexiata e rúa Zapatería cara Isabel López Gandalla.

Autobuses

O servizo de de autobús urbano experimentará modificacións nas liñas que percorren o centro da cidade con motivo da celebración da carreira. A principal afección do transporte público será o corte nos Cantóns, no sentido saída da cidade, polo que as liñas 1, 1A, 2, 2A, 17, 23 e 23A, procedentes do Abente y Lago, cambiarán o itinerario e circularán, ao seu paso pola avenida da Mariña por Ambrosio Feijoo e avenida do Porto para chegar á praza de Ourense.

De cara á concentración das e dos deportistas nos tramos de Paseo Marítimo, Metrosidero e Maestranza, as liñas 3, 5 7 e 17 poderían experimentar modificacións se o paso da carreira é prolongado. Así, as liñas 5 e 17 desviaríanse desde a praza de Ourense pola avenida do Porto e túnel de María Pita para saír na Praza das Atochas e incorporarse, en Orillamar, no seu itinerario habitual. Pola banda das liñas 3 e 7, estas desviaríanse desde San Andrés por rúa Alta, Paseo Marítimo, Hospital, Campo da Leña e Orillamar. No sentido de circulación de rúa Torre cara Porta Real, as liñas 3A e 17 circularán, desde Campo da Leña, por Panaderas, Orzán e San Andrés cara a praza de Pontevedra, punto no que recuperarán o seu percorrido habitual.