A terceira carreira popular do V Circuíto Coruña Corre celebrarase o próximo 15 de xaneiro no barrio de Matogrande. A proba absoluta, que comezará ás 10.30 horas, terá a súa saída e meta na rúa Sebastián Martínez Risco, á altura co Colexio Liceo La Paz, e desenvolverase polo barrio coruñés así como pola rede viaria do Campus de Elviña. En total participarán 1.631 persoas, das que 448 son menores de idade. Co gallo desta competición, o Concello despregará un dispositivo especial de tráfico que provocará cortes na circulación dos vehículos na zona e limitacións no estacionamento, ademais da supresión da parada de taxis e de autobús na glorieta interior de Matogrande desde as 10.15 ata as 13.15 horas.

Así, desde as 06.00 horas, non estará permitido o estacionamento na rúa Sebastián Martínez Rico, que se cortará ao tráfico na zona fronte ao Liceo, onde estará situada a zona da saída, desde as 08.00 ata as 14.00 horas. O corte no percorrido do circuíto da carreira absoluta producirase desde as 10.20 horas ata as 11.15 horas. Deste modo, aínda que non se poderá circular polas rúas Sebastián Martínez Rico, Juan Díaz Porlier, Carlos Martínez-Enrique Mariñas, permitirase a permeabilidade das mesmas no acceso aos garaxes. Tamén estará pechada á circulación a estrada de Pocomaco, sentido Matogrande, desde a nova glorieta de conexión coa Universidade, manténdose en todo momento o sentido Matogrande-Pocomaco. Ademais, tamén estarán cortados ao tráfico vías da zona do campus universitario, polo que a saída de vehículos dos estacionamentos será xestionada tamén por persoal municipal.

En relación ao percorrido que se verá afectado pola celebración de carreiras de menores, que terán lugar de 11.35 horas a 13.15 horas, realizaranse cortes á circulación de forma descontinua, permitindo a saída e a entrada aos garaxes nas rúas Sebastián Martínez Risco, Juan Díaz Porlier e Carlos Martínez-Enrique Mariñas.
 

Retirada de dorsais

Os dorsais para a II Carreira Popular Matogrande poderán recollerse no Colexio Liceo La Paz este sábado 14 de xaneiro, de 11.00 a 13.30 horas e de 16.30 a 21.00 horas, así como o domingo 15 ata unha hora antes do inicio de cada carreira. No propio recinto escolar estará situado o servizo de duchas e gardarroupa o día da proba, cuxa entrega de premios será ás 13.15 horas.

Para máis información sobre esta e outras probas do circuíto Coruña Corre, pode visitarse a páxina web municipal www.coruna.gal/carreiraspopulares