Coruña42 bríndalles esta semana aos seus corredores populares unha nova oportunidade para compartir vivencias cos mellores e con ese fin organiza unha nova Masterclass, que nesta ocasión contará cos atletas galegos Pedro Nimo e Paula Mayobre. O evento deportivo, organizado polo Concello a través da súa Concellería de Deportes e El Corte Inglés, terá lugar na Praza da Cubela, detrás de El Corte Inglés este mércores día 16 ás 19.00 horas. Esta nova sesión será, coma as anteriores, de carácter gratuíto e todas as persoas participantes recibirán un obsequio. Todos os que desexen formar parte aínda poden facelo inscribíndose a través do seguinte enderezo: carreraspopulares@coruna.es.

Tras a boa acollida das dúas pasadas clases maxistrais, impartidas por Andrés Díaz, Yolanda Gutiérrez e Paula Mayobre, a aresana, que xa dirixiu un adestramento co propio Andrés Díaz o pasado 22 de marzo, repetirá agora, pero terá nesta ocasión como compañeiro a Pedro Nimo. Será unha dupla de luxo a que formarán ambos os corredores, que están actualmente en plena forma. O atleta compostelán disputou esta pasada fin de semana o Maratón de Londres, finalizando nun honroso 14º posto, despois de ter que realizar practicamente toda a proba en solitario e foi, ademais, o cuarto europeo en cruzar a meta cun tempo de 2h14.15. Na cita londiniense impúxose o kenyano Wilson Kipsan, con récord da proba incluído (2h.04.15). Pola súa banda, Paula Mayobre proclamouse campioa tamén a pasada fin de semana da MediaSan do Camiño, despois de manter unha interesante pugna con Ester Navarrete.

Coruña42 convida a todos os corredores a non deixar pasar a oportunidade de compartir unha nova Masterclass, nesta ocasión dirixida por Pedro Nimo e Paula Mayobre e vivir a experiencia de realizar unha sesión de traballo con dous atletas de elite nun ambiente distendido. Con este evento, o Maratón Atlántica e o Concello da Coruña, en colaboración con El Corte Inglés, reforzan o seu compromiso de seguir ofrecendo as mellores actividades paralelas, máis aló da propia competición do próximo domingo 27 de abril.