O 10 de agosto é a data sinalada para poñer o broche de ouro á segunda edición do Circuíto Coruña Corre, a cal elevou o seu número de participantes nun milleiro con respecto á súa estrea. A III Volta a Oza será a protagonista e terá como punto neurálxico o Parque de San Diego para a montaxe de saída e meta, apoiados polo Centro Deportivo Municipal alí situado para os servizos complementarios da carreira.

O ano pasado a Volta a Oza buscou un percorrido máis racional para cumprir con aspectos relativos á seguridade dos corredores, e en base a eles pretendeuse cumprir obxectivos transversais como dar a coñecer novas contornas da cidade que permiten a práctica do running. Así naceu a carreira dos tres parques, unindo San Diego, Eirís e Oza nun percorrido duro pero que mostra belas paraxes da Coruña.

Para este ano a idea é manter a filosofía xeral, e só se produce unha pequena variación na carreira absoluta, nos tramos de unión entre o parque de Eirís e o de Oza. Isto é debido ás obras de eliminación dun tapón urbanístico que o barrio do Castrillón demandaba dende hai tempo, e que ao Coruña Corre tamén o enriquecerá a partir de que a obra estea terminada.

Presentámosvos os circuítos para a última festa do II Coruña Corre!

Pode descargar os planos da carreira nos seguintes contidos