O concelleiro de Deportes, Francisco Mourelo, e o concelleiro de Medio Ambiente, Enrique Salvador, acompañados polo director da Axencia de Ecoloxía Urbana, Francisco Pan – Montojo, presentaron esta mañá as accións que o Concello e a Axencia de Ecoloxía Urbana do Eixo Atlántico, Eixoecoloxía, poñerán en marcha por segundo ano consecutivo para a implantación dun sistema de xestión sostible para o Maratón Coruña42 que pretende ademais concienciar a cidadanía sobre a importancia de coidar a súa contorna natural.

“Un dos nosos obxectivos é o de potenciar a sostenibilidade á hora de organizar grandes eventos como o noso Maratón Atlántica Coruña42”, destacou Mourelo, quen lembrou que tamén é unha grande oportunidade para fomentar a cultura da sostenibilidade como das persoas participantes.

A proba contará coa participación do departamento municipal de Medio Ambiente, a través da súa Oficina Contra o Cambio Climático, e de Eixoecoloxía para a introdución de criterios de sostenibilidade no evento. “O proxecto, que arrincou na edición 2013 do Maratón pretende que o evento cumpra cos requisitos da norma ISO 20121 de xestión da sostenibilidade en eventos, incorporando un marco de traballo de mellora continua para implementar un proceso organizativo sostible”, explicou Enrique Salvador.

Así, nesta nova edición, ademais das medidas postas en marcha o ano pasado, inclúense como novidade o servizo de recollida de atletas en hoteis así como o transporte en autobús á meta por parte da organización co fin de minimizar o transporte individual. Tamén se realizará unha recollida de datos relacionados co consumo de enerxía eléctrica e combustibles fósiles co obxectivo de efectuar o cálculo da pegada de carbono, formular propostas de redución, e propoñer proxectos de compensación e accións simbólicas no noso territorio. “Trátase dunha acción moi importante xa que o ano pasado, grazas á medición da emisión de gases, comprobouse que o maior impacto viña provocado polo uso do coche particular, xa sexa dende as cidades de orixe ou polo transporte da cidadanía. Por iso se puxo en marcha esta iniciativa que non só comprende a recollida dos atletas en bus senón outras accións como a apertura dun foro para os corredores no que poidan buscar opcións para compartir coche nos seus traslados”, explicou Mourelo.

O concelleiro de Medio Ambiente explicou que o ano pasado comezou a colaboración entre ambos os departamentos para a posta en marcha de diversas medidas para a catalogación desta proba atlética como evento sostible. Neste sentido, xa na edición do 2013 puxéronse en marcha iniciativas que se manterán durante este ano co obxectivo de minimizar o impacto ambiental desta competición. “Por exemplo, poñeranse a disposición das persoas participantes materiais respectuosos co medio ambiente como a bolsa do atleta confeccionada en material Ecológica Line; o plano do circuíto e información aos atletas que será en papel reciclado; ou unha bolsa de plástico ecolóxica para a entrega de roupa e efectos persoais en roupeiro”, explicou Enrique Salvador, quen tamén sinalou que se instalarán colectores para a recollida e selección de residuos orgánicos e inorgánicos na zona de meta e circuíto, para o seu posterior tratamento e transformación.

Francisco Mourelo e Enrique Salvador puxeron como exemplo os esforzos realizados en materia de eficiencia enerxética e loita contra o cambio climático a través de accións específicas, como o emprego de bicicletas para membros da organización; a utilización dun vehículo híbrido para a cronometraxe; ou a instalación dunha zona de información aos atletas e público sobre os eventos sostibles, durante a ExpoRunning, como compromiso da organización co medio ambiente.

A aposta do Goberno municipal por realizar un maratón sostible é un paso máis no obxectivo de converter A Coruña nun dos referentes deportivos do noroeste español.

“A organización de eventos neutros en carbono é unha medida enmarcada na nosa Estratexia Contra o Cambio Climático, documento base para a consecución dos obxectivos do Pacto dos Alcaldes ao que estamos adheridos dende o 2012. Este compromiso municipal destinado á mitigación das súas emisións de CO2, ten un efecto multiplicador pola concienciación dos miles de participantes neste e noutros eventos, e pola súa difusión a través dos medios de comunicación e das redes sociais. É dicir, con estas pequenas actuacións e compromisos, pretendemos facer unha gran contribución á loita contra o cambio climático”, concluíu Salvador.