A Asociación de comerciantes Castrillón, Eirís e Monelos puxo en marcha no ano 2012 a primeira edición do Día da Familia, co obxectivo de dinamizar a súa área comercial, e despedir as vacacións de verán en familia. A iniciativa callou grazas á colaboración dos establecementos de todo o barrio, e xa no 2013 o seu programa creceu en contidos para desenvolverse durante dúas xornadas. Nesa liña de crecemento formulouse no 2014 a realización dunha carreira infantil que discorrerá polo interior do Parque de Eirís, e para iso puxéronse en contacto coa Concellería de Educación, Deportes e Xuventude, quen a través do seu Servizo Municipal de Deportes colaborará na organización, apoiados tamén na experiencia do Club Coruña Comarca.

O 7 de setembro realizaranse as carreiras cos seguintes horarios e categorías:

• 11.30 horas: saída infantil masculina (nacidos en 2001 e 2002)
• 11.40 horas: saída infantil feminina (nadas en 2001 e 2002)
• 11.50 horas: saída alevín masculina (nacidos en 2003 e 2004)
• 12.05 horas: saída alevín masculina (nadas en 2003 e 2004)
• 12.30 horas: saída pitufos (nacidos en 2007 e posteriores) (realizaranse tantas quendas como sexa necesario segundo o número de participantes).

A inscrición será gratuíta o mesmo día da proba ata media hora antes de cada saída, e para levala a cabo deberase acudir á Cúpula do Parque de Eirís, onde se lles entregará un dorsal ás  persoas participantes.

Todos os nenos e nenas que se acheguen a participar recibirán unha medalla ao chegar á meta, ademais de avituallamento líquido para repoñer enerxías.

Os obxectivos do Día da Familia intégranse á perfección na filosofía do Coruña Corre, así que agardámosvos a todos nunha nova cita para gozar correndo dunha bonita contorna da cidade.