Coruña42 cerrou esta fin de semana o seu terceiro prazo de inscrición e reafírmase como unhas das probas punteiras no calendario tanto galego como nacional, con case 3000 corredores anotados nesta terceira edición do Maratón Atlántica, que se disputará este domingo 27. No caso de Coruña42 haberá un total de 1134 inscritos, mentres que a 10k tamén tivo unha grande acollida con 1722 corredores que tomarán a saída.

Con estes números encima da mesa, un total de 2856 runners estarán na saída de Coruña42, o que reafirma o bo momento que vive esta carreira e a consolidación do fomento da práctica deportiva saudable como un valor engadido e un éxito de acollida. A estes datos haberá que engadir os anotados no Campionato Galego, que xirarán arredor da media centena, o que achegará aínda máis a participación case a ese número máxico dos 3000 anotados.

As actividades desenvolvidas este ano deron, se cabe, un maior valor engadido. É o caso das tres Masterclass realizadas contando coa participación de grandes atletas galegos profesionais, Andrés Díaz, Paula Mayobre, Yolanda Gutiérrez e Pedro Nimo. Unha grande oportunidade a que gozaron os atletas populares de adestrar con grandes corredores e aprender os seus trucos de adestramento. Esta edición, ademais, a Exporunning cambiará de sede, trasladándose a Palexco, para ofrecer maior comodidade e confort aos seus participantes. Ademais, como grande apertura proxectarase de forma gratuíta o documental “Fiz, puro maratón”, que contará coa presenza do propio Martín Fiz. Enlace á inscrición en Ticketea

De igual modo, o sábado Coruña42 dará un paso adiante coa realización da Pasta Party, un evento culinario nunha contorna de luxo, un restaurante con vistas á baía de Coruña e cun amplo menú buffet a prezos simbólicos, a través deste enlace podes acceder á inscrición en Championchipnorte. Todas estas accións, unidas a outras xa realizadas noutras edicións, como o programa de sostenibilidade e animación ou o ciclo de conferencias durante a ExpoRunning, volverán facer do Maratón Atlántica unha festa do deporte o próximo 27 de abril.