Con máis de catro meses por diante xa son 16 as provincias españolas que incorporan corredores e corredoras que gozarán da cuarta edición do Maratón Atlántica Coruña42. A comunidade autónoma galega, así como Asturias e Portugal, son as áreas máis representadas, constatando o feito de que na Coruña temos o único maratón homologado do noroeste peninsular.

Con motivo do Maratón do Porto, Coruña42 promocionouse na feira do corredor, dando os seus froitos ata o momento cunha boa presenza de corredores portugueses xa inscritos para a cita. En datas recentes foi no maratón de Valencia onde, de novo da man de Turismo Coruña, tamén se instalou un posto para que os corredores do terceiro maratón español en participantes, coñecesen o plus que supón correr un situado a beiras do Atlántico.

Aínda queda moito tempo para o 19 de abril do 2015, así que esperamos que o noso mapa continúe coloreándose, lembrando sempre os diferentes prazos para inscribirse, ademais das vantaxes para desempregados e pensionistas.