A Carreira da Muller volve este domingo ás 10.00 horas á Coruña na súa segunda edición, que bateu récord de participación, con 5.000 mulleres inscritas. O percorrido, de 5 quilómetros 200 metros aproximadamente, sairá dende o inicio do novo Paseo do Parrote, chegará ata a altura do Club do Mar de San Amaro e regresará en dirección oposta, finalizando á mesma altura cá saída.

A recollida de dorsais, chip e bolsa da corredora poderase realizar no Frontón de Riazor o venres 19 e o sábado 20 de 10 a 14.00 horas e de 16 a 20.00 horas. Para retiralos será necesario o resgardo da inscrición presencial ou o PDF da inscrición vía web. De non contar con estes documentos, poderase presentar DNI ou a súa correspondente fotocopia. Tamén será posible recoller máis dunha bolsa do corredor, para o que será necesario incluír algún destes documentos.

Así mesmo, poderase visitar no Frontón a feira da corredora composta por diferentes postos dos principais patrocinadores da Carreira da Muller. Unha competición popular onde a principal finalidade é participar e recadar fondos para a loita contra o cancro. Un evento no que A Coruña demostrou que é unha cidade solidaria, comprometida e enganchada ao running. A marea rosa chegou á cidade herculina.