A Biblioteca Municipal de Ágora organiza un taller impartido polo debuxante Manel Cráneo o 14 de agosto ás 17.00 horas destinado a nenos e nenas de 6 a 10 anos onde poderán aprender e practicar a creación de personaxes e mundos imaxinarios a través do debuxo e das palabras. Realizaranse chapas para que cada neno e nena poida levar para a casa.

Ademais, durante o taller terá lugar a lectura de dous libros de Diario Pichük con ambiente sonoro en directo.

Para poder participar no taller é necesiario formalizar unha inscrición previa a partir do 28 de xullo cubrindo un formulario no Blog de Fancomic 

O taller estará impartido por Manel Cráneo

Manel Cráneo é debuxante e ilustrador cunha ampla actividade dende mediados dos anos noventa, cando promoveu numerosísimos fanzines como: Ovo, Costra de postre, Los rústicos de la guadaña, Craneografía e Craneofilia.

Participou nas dúas etapas da revista Golfiño realizando a serie A fraga Milmañas con guións de Carlos Amil. Traballos seus viron a luz en cabeceiras colectivas como Barsowia e Subterfuge. Ex-presidente da Asociación Galega de Profesionais da Ilustración (AGPI), liderou a súa práctica refundación no 2003.

Na mesma época foi o principal promotor con Kike Benlloch do Colectivo Chapapote, resposta ao desastre do Prestige coa participación de ducias de ilustradores. Ademais dunha longa experiencia en cartelismo e publicidade, é o responsable do storyboard de diversos filmes O lapis do carpinteiro e curtametraxes A ti como se che di adeus.