Podes atopar nun cactus o sentido da vida? Agustín é un desastre. Aos 37 anos, vive de okupa en casa dos seus anciáns e achacosos pais, a súa noiva deixouno, e contense tan pouco ao insultar os seus alumnos nas clases de literatura como ao agarrar a botella e o volante case sen marxe de tempo. Por iso, cando é despedido tras a súa enésima tolemia e está a piques de tirarse el mesmo pola borda con todo o que arroxou xa, decide aceptar un plan tan demencial que só pode funcionar: marchar durante o verán á Universidade de Stanford, en California, para seguir un curso sobre cactus.

Viaxa a Estados Unidos cun humor de cans pero algo no chan californiano axiña o vai serear, quizais só dándolle un pouco de perspectiva para unha vida que, iso si, parece inmune a calquera obxectivo a medio ou longo prazo. Coñece as súas compañeiras de curso, media ducia de saudables e novas universitarias que pronto o adoptan como a súa mascota, coqueteando con el de modo moi adolescente, e a súa profesora Cynthia, unha muller impredicible e temperamental. A nova vida de Agustín parece marchar ben, coma unha seda e ao volante dun gran coche que lle permite visitar centros comerciais e empaparse da luminosa vida californiana... pero non é ouro todo o que reloce e a coiraza cínica do antiheroe convidará á risa pero tamén á amargura e a melancolía.

RODRIGO MUÑOZ AVIA (Madrid, 1967) publicou no 2005 a súa primeira novela para adultos Psiquiatras, psicólogos y otros enfermos (Alfaguara), acollida con notable éxito polos lectores e reeditada en múltiples ocasións. Publicou ademais as novelas xuvenís Lo que no sabemos (Alfaguara Xuvenil, Premio Jaén 1996) e El portero de hockey, e as novelas infantís Julia y Gus visitan el top manta e Los perfectos (Premio Edebé de Literatura Infantil 2007).

Como guionista de cinema colabora asiduamente co seu irmán Nicolás Muñoz; neste campo destaca cos guións da longametraxe Rewind (1998), do documental El viaje de Susu (2003) e da longametraxe en fase de produción Animales de compañía (2007).

Nas últimas datas realizou o labor de compilación e introdución de dous libros especialmente queridos para el, un sobre o seu mellor amigo, un alpinista falecido no Himalaya no 2001 (Alfonso Vizán, un pirata en la montaña, 2004) e outro sobre os escritos que deixou o seu pai (Lucio Muñoz, el conejo en la chistera, 2006). Igualmente publicou diversos estudos de arte contemporánea, fundamentalmente sobre a obra de Lucio Muñoz.