Os contos de Joselín é o resultado do traballo de investigación de aCentral Folque sobre a figura de Joselín, considerado como o primeiro narrador oral galego, que recibiu recoñecemento e fama nos anos 20 do pasado século e que agora ve rescatadas e editadas todas as gravacións dos seus contos orais nun coidado libro-disco.

Con presenza de diferentes referentes do teatro na Coruña, na presentación explicarase a historia desta figura da cultura galega que agora se recupera e dáse a coñecer ao gran público.

A actividade, que terá lugar o mércores 30 ás 19 horas, enmárcase dentro do ciclo Conversas no Ágora, que a Biblioteca Ágora desenvolve dende a vontade de ofrecerse como espazo para o debate e a difusión de ideas.