El puente invisible (autoedición 2014) podería ser definido como unha sesión de maxia con baralla, cello, piano e violín, que non é pouco dicir, pero queda algo curto debido á experiencia visual e á atmosfera creada ao longo da construción da devandita ponte. Caos, poesía, Alicia, Nunca, Escher, soños, pesadelos, Rajmáninov e espellos son algúns dos elementos que conforman os piares desta auténtica e poética obra de enxeñería.

Esta exposición fotográfica, Aixam, xorde coa intención de introducir o observador descoñecedor das reviravoltas do mundo máxico nos asombrosos segredos da cartomaxia e marabillar o coñecedor capturando instantes asombrosos nun só fotograma.

Esta serie realizouse na Coruña entre setembro do 2013 e agosto do 2014 no Teatro Colón e nun estudo efémero instalado nun piso cun as de picas na porta.