"Toc Toc" é a chamada á porta do mundo das nenas e dos nenos. Un mundo de alegría, ilusión, amizade e compañeirismo, onde non teñen cabida as guerras, e si a defensa do medio ambiente, a protección dos animais, a ilusión da chegada do Nadal, a fantasía do mundo dos piratas e, como non, o mundo paralelo das nenas e dos nenos: os contos, onde poden aparecer protagonistas femininas, creativas e decididas (e non nenas/mulleres inxenuas como a tradición literaria deste xénero nos presenta habitualmente) xogando así un papel máis próximo á sociedade de hoxe en día.

Tamén hai humor, como os animais que forman unha orquestra, loitas atmosféricas entre anticiclóns e borrascas, os bonecos que poden centrar a vida das/os nenas/os.

No terreo musical, "Toc toc" rima con rock, pop, folk e tamén soul, a alma da música moderna que partiu da tradición cultural e musical de moitos países africanos que neste caso mestúrase coa tradición musical galega. Desta última aparecen dous romances infantís: O piollo e a pulga e Mazarico.