Comezará o GRUPO DOS MÁIS PEQUENOS que presentará un par de danzas alemás do sempre xenial W.A. Mozart e continuará cunha divertida suite da profesora H. Burgoyne que percorrerá en cinco movementos distintos momentos do día: ao levantarse, ao mediodía cun paseo, pola tarde xogando no parque, un momento de televisión cunha serie de intriga e unha festa na "disco".

Despois tocaralle a quenda ao GRUPO DE MAIORES que comezará a súa intervención coa sinfonía "Alla rústica" de A. Vivaldi, viaxaremos ao norte con dúas pezas do compositor noruegués E. Grieg e saltaremos o charco para gozar dunha suite do composior brasileiro E. Aguiar que nos fará lembrar os ritmos do continente americano.

A Orquestra de Nenos da Sinfónica de Galicia (ONSG), formada por 83 nenos e nenas de entre 6 e 15 anos, achega os cimentos da formación grupal necesaria para a práctica da música en orquestra sinfónica. Baixo a dirección de Jorge Montes e Enrique Iglesias Precedo, a ONSG ofreceu o seu primeiro concerto público na Coruña en abril do 2011.