Inaugurado a comezos do pasado outubro cun dos máis influentes poetas da China contemporánea, o ciclo POETAS DI(N)VERSOS continua a súa programación que encherá as próximas citas de abril, maio e xuño.

Deste xeito, a oferta poética dirixida pola escritora e dinamizadora cultural Yolanda Castaño e promovida pola Concellería de Cultura da Coruña, continúa mostrando algunhas das mellores voces da poesía actual tanto galega coma do resto do mundo. E faino sempre en lecturas dobres, abertas e gratuítas, de aproximadamente unha hora de duración, realizadas mes a mes no Auditorio do Centro Ágora e conducidas pola propia Castaño, como sempre en luns e como sempre ás 20.30 h.

Os recitais deste novo trimestre comezarán xa o próximo 14 de abril, con María Eloy-García e Iolanda Zúñiga; continuará o 12 de maio, con Ming Di e Armando Pexegueiro; e, por último, 9 de xuño, con Adonis e Manuel Álvarez Torneiro.

O ciclo seguirá facendo unha decidida aposta polas librerías de barrio, que poñerán á venda en cada acto os títulos dos e das protagonistas. As persoas asistentes poderán levar, así, sinaturas dos autores nos exemplares dos seus libros. Os novos retallos constituirán máis ocasións de establecer entre lectores/as e poetas un contacto directo, humano e cheo de emoción.