Estas 8 rutas inclusivas (comezan o 11 de marzo e rematan o 17 de xuño) realizadas en sábado pola tarde, ofrecen a posibilidade de gozar do contacto coa natureza descubrindo algunhas das paisaxes máis fermosas da nosa costa.

Cada etapa do camiño poderá alcanzar unha lonxitude duns 9 kms e contará con voluntari@s de apoio, membros de protección civil,...

Nesta segunda edición do Camiño dos Faros Sen Límites teremos a ocasión de gozar do tempo ao aire libre coñecendo algúns dos lugares de maior riqueza natural e inaccesibles, ata agora, para a diversidade de persoas que participemos.

Uns camiños onde compartiremos experiencias en igualdade, un motivo da existencia deste camiño inclusivo.

Porque este Inclusivo Camiño dos Faros Sen Límites dinos que nunca debemos perder o dereito a incluír, a compartir, ao recoñecemento da diversidade porque, senón, perderemos o dereito a ser libres.